‘मनुवाद अजूनही संपलेला नाही; सावध पावलं टाकायला हवीत’

0 0

उदाजी महाराज शैक्षणिक वारसा संग्रहालयाच्या लोकार्पण सोहळ्यात बोलताना अन्न व नागरी पुरवठा मंत्री छगन भुजबळ यांनी आज माजी शिक्षणमंत्र्यांना जोरदार टोला हाणला.

नाशिक: ‘ज्या देशात महिला आणि बहुजनांना शिक्षण मिळालं, ते सारे देश पुढे गेले. पण, आजही आपल्याकडं बहुजन आणि महिलांच्या शिक्षणात अडचणी आहेत. त्यामुळं भारतासह शेजारचे देश मागे राहिले. मनुवाद अजूनही संपलेला नाही. आपण सावध पावलं टाकायला हवीत,’ असा इशारा राज्याचे अन्न व नागरी पुरवठा मंत्री छगन भुजबळ यांनी आज दिला.

उदाजी महाराज शैक्षणिक वारसा संग्रहालयाच्या लोकार्पण सोहळ्यात ते बोलत होते. ‘सत्यशोधक मार्गानं जात सर्वांना शिक्षण देण्यासाठी आपण प्रयत्नशील राहायला हवं,’ असं भुजबळ म्हणाले. ‘कॉलेज व संग्रहालयाच्या इमारती अतिशय सुंदर, प्रेक्षणीय आहेत. पण फक्त वास्तू अप्रतिम असून उपयोग नाही, संस्थेचे नेते आणि कार्यकर्त्यांचे काम देखील कायम उल्लेखनीय असेल हे पाहिलं पाहिजे,’ अशी अपेक्षा त्यांनी व्यक्त केली.

‘या शिक्षण संस्था राष्ट्रवादीच्या आहेत, असं मागच्या सरकारमधील शिक्षणमंत्री एकदा म्हणाले होते, याची आठवण देत भुजबळ म्हणाले, ‘त्यांचा जन्मही झाला नव्हता, तेव्हापासून शिक्षणाच्या प्रसारासाठी आम्ही कार्यरत आहोत. मग संस्था आमच्या असणारच.’ ‘अनेकांना संस्थेचा इतिहास माहिती नसतो. हा इतिहास लक्षात घेतला पाहिजे, असा चिमटा भुजबळ यांनी काढला.

‘या’ संस्थांवर कुठल्याही राजकीय पक्षाचा टॅग नाही!
‘कुठलंही सरकार सामाजिक संस्थेचं मायबाप असतं. भाजप सरकारच्या वेळी तुकड्यांची परवानगी मिळविण्यासाठी गेले असता, ‘या संस्था राष्ट्रवादी काँग्रेसचे’ असल्याचं तत्कालीन शिक्षणमंत्री म्हणाले होते. पण, या संस्थांना कोणत्याही पक्षाचा टॅग लागलेला नाही. मी कोणतीही मागणी आतापर्यंत केलेली नाही. शिक्षणमंत्र्यांकडे सीबीएसई स्कूलची परवानगी मिळावी, यासाठी प्रयत्न सुरू आहेत,’ अशी माहिती मराठा विद्या प्रसारक संस्थेच्या सरचिटणीस निलिमा पवार यांनी यावेळी दिली.

Leave A Reply

Your email address will not be published.