तिळाच्या लाडवांनाही ग्राहकांची प्रतीक्षा

यंदाही तिळाचे लाडू आणि हलव्याने मिठाईच्या दुकानांसह छोटी-मोठी दुकाने सजली असली तरी पूर्वीसारखी विक्री होत नसल्याची खंत या विक्रेत्यांकडून व्यक्त करण्यात येत आहे.  ‘गेल्या वर्षीही प्रतिसादाअभावी बरेच तयार लाडू आणि अन्य साहित्य टाकून द्यावे लागले. यंदा नागरिक बाजारपेठेत येतील या आशेने आम्ही पूर्वतयारी केली होती. परंतु करोना वाढत असल्याने संसर्गाच्या भीतीने नागरिक तयार लाडू घेण्यासाठी धजावत नाहीत. यंदा तिळाचे, गुळाचे दर वाढूनही आम्ही लाडवांच्या किमतीत फारशी वाढ केलेली नाही. येत्या दोन दिवसांत प्रतिसाद वाढण्याची आशा आहे,’ असे दादर परिसरातील लाडू विक्रेत्या लक्ष्मी नागवेकर  म्हणाल्या.  ‘करोनामुळे पदार्थ घरी तयार करण्याकडे कल वाढला आहे. शिवाय मकरसंक्रांतीनिमित्त होणारे सोहळे, महिलांचे समारंभ कमी झाल्याने त्यांच्याकडून येणारी मागणीच बंद झाली,’ असे दत्तकृपा फुड्सचे अनिकेत आपटे यांनी सांगितले.

हळदीकुंकू समारंभांत घट

पूर्वी मकरसंक्राती ते रथसप्तमी या काळात महिलांचे हळदीकुंकू समारंभ मोठय़ा प्रमाणात होत असतात. करोना संसर्गाच्या भीतीने अशा कार्यक्रमांवर मर्यादा घालण्यात  आली आहे. ‘पूर्वी सोसायटी, गृहसंस्था, महिलांचे समूह, कंपन्यांमधील महिला कर्मचारी, शिक्षिका यांच्याकडून मकरसंक्रांतीचे वाण आवर्जून खरेदी करण्यात येत होते. गेल्या दोन वर्षांत त्यासाठीची मागणी ६० टक्क्यांनी घसरली आहे,’ असे बाजारपेठातील विक्रेत्यांनी सांगितले.

दरवाढ